Benín - Couscous Azindessi

Benín er land í Vestur-Afríku sem á landamæri að Tógó, Nígeríu, Búrkínu Fasó og Níger. Höfuðborg landsins heitir Porto Novo og í landinu búa tæplega 11 milljónir manna á svæði sem er örlítið stærra en Ísland. Opinbert tungumál landsins er franska en þar eru þó 55 mismunandi tungumál töluð. Flestir Benínar tala fleiri en eitt tungumál. Flestir íbúanna eru kristnir (43%) en einnig eru margir íslamstrúar (24%) og vúdú-trúar (17%). Nokkur konungsríki ríktu á svæðinu áður en Evrópumenn hófu þrælaviðskipti við strendur landsins. Reyndar var það svo að konungurinn í einu konungsríkinu, Dahomey, græddi mikið á því að selja Evrópubúm stríðsfanga. Þegar þrælahald lagðist að mesti leyti af á 19. öld missti konungsríkið stöðu sína og völd. Frakkar tóku yfir landið árið 1892 og ríkti yfir landinu í 68 ár. Nokkur átök á stjórnmálasviðinu urðu í landinu eftir sjálfstæði og það var ekki fyrr en 2006 sem fyrsta frjálsa og sanngjarna kosningin var haldin í landinu.  Núverandi forseti landsins, Patrice Talon, var kosinn í fyrra og ætlar meðal annars að gera miklar breytingar á stjórnarskrá landsins til að auka lýðræði og minnka spillingu í landinu. Lífsgæði í Benín eru ekki góð. Læsi er með því lægsta sem gerist í heiminum, árið 2015 var talið að aðeins 38,4% landsmanna væru læs.

Maturinn í Benín er mjög líkur því sem gerist annars staðar í Vestur-Afríku. Kjöt er almennt notað sparlega í landinu vegna þess hve dýrt það er. Maís er mikið notaður, auk jarðhneta, tómata, hrísgrjóna, bauna, kúskús og ávaxta. Rótargrænmeti er einnig stór partur af fæðu Benína. Pálmaolía er helst notuð til steikingar. 

Couscous Azindessi

3 hvítlaukssrif, smátt söxuð

1 kjúklingatengingur, marinn

1/2 tsk engiferduft

1/4 tsk svartur pipar

kjúklingalæri með beini

1 tómatur, gróft saxaður

1 laukur, gróft saxaður

5 dl kjúklingasoð

3 msk jarðhnetuolía

1 msk tómatmauk

4 msk hnetusmjör

1 tsk salt

100 g salthnetur

4 vorlaukar, smátt sneiddir

1. Setjið hvítlaukinn, kjúklingateninginn, engiferduft og svartan pipar í skál ástam kjúklingnum. Geymið.

2. Setjið tómatinn, laukinn og 2 dl af kjúklingasoðinu í blandara og blandið þar til blandan er orðin að mestu kekkjalaus. Geymið.

3. Takið fram stóra pönnu og hitið 2 msk af olíunni á henni. 

4. Brúnið kjúklinginn á pönnunni og bætið svo tómat-lauk-blöndunni út á. 

5. Lokið pönnunni þar til fer að sjóða. Hrærið þá tómatmaukinu og hnetusmjörinu út í. 

6. Lækkið hitann á miðlungshita og eldið kjúklinginn áfram með lokinu á. 40-45 mínútur. 

7. Þynnið sósuna með vatni ef ykkur finnst hún vera orðin of þykk. Saltið eftir smekk. 

8. Berið fram með salthnetum og vorlauk út á til skrauts. Venjulega væri kúskús borið fram með þessum rétti en ég gerði lágkolvetna fufu. 

Þá eru 54 af 198 löndum búin! Næsta stopp er í einu minnsta landi í heimi... San Marínó!

Afríka: 16 af 54 (29%)

Asía: 6 af 49 (12%)

Evrópa: 15 af 46 (33%)

Eyjaálfa: 7 af 14 (50%)

Norður Ameríka: 6 af 23 (26%)

Suður Ameríka: 4 af 12 (33%)

Samtals: 54 af 198 (27%)