Papúa Nýja Gínea - Kjúklingur og grænmeti í kókosmjólk

Hér kemur heil ritgerð um land sem mér finnst eitt það allra merkilegasta í heimi. 

Papúa Nýja Gínea er eyríki í Eyjaálfu í Suðvestur-Kyrrahafi sem á landamæri að Indónesíu en er einnig norður af Ástralíu og vestan við Salómonseyjar. Höfuðborg landsins heitir Port Moresby og í landinu búa um 8 milljónir manna á svæði sem er rúmlega fjórum sinnum stærra en Ísland. Flestir íbúanna eru kristinnar trúar en margir blanda hefðbundinni andatrú landsins við kristnina. Það var ekki fyrr en seint á 19. öld sem Evrópubúar hófu landnám á Papúa Nýju Gíneu og það voru Bretar og Þjóðverjar upp úr 1884. Eyjaskeggjar höfðu átt í viðskiptum við fólk frá Suðaustur-Asíu í nokkur þúsund ár með fjaðrir paradísarfuglsins, sem lifir þar í landi. Papúa Nýja Gínea varð sjálfstætt ríki árið 1975. Landið glímir við fjölda vandamál, enda er landið þróunarland. Meðal vandamálanna er ofbeldi gegn konum, en fjöldi nauðgana er gríðarlega hár. Sömuleiðis eru 50-150 "nornir" drepnar ár hvert í landinu fyrir svartagaldur. Þrátt fyrir öll vandamál landsins er það einstakt á mörgum sviðum. Þar er m.a. að finna dýr sem hvergi finnast annars staðar og þar má finna einu pokadýrin utan Ástralíu. Landið er hálent og þar vaxa gríðarmiklir regnskógar. Það er því erfitt yfirferðar og stöðugt finnast þar nýjar tegundir dýra og plantna. Skógarnir eru þó í mikilli hættu m.a.  vegna pálmaolíuframleiðslu og gull- og kopargreftri.

Þegar kemur að menningu er Papúa Nýja Gínea sennilega eitt það fjölbreyttasta í heimi. Í landinu búa hundruðir mismunandi þjóðflokka sem skiptast í nokkur þúsund samfélög. Sum samfélagana hafa átt í stíði sín á milli í mörg hundruð ár. Sumir þjóðflokkanna voru alveg einangraðir vegna þess hve hálent og erfitt yfirferðar landið er. Á Papúa Nýju Gíneu eru töluð yfir 800 "upprunaleg/papúsk" tungumál. Það er um 12% allra tungumála heims. Flest þeirra tala aðeins nokkur hundruð til nokkur þúsund manns. Það fjölmennasta nefnist Enga og það tala um 200.000 manns. Tok Pisin, sem er kreólamál úr ensku, er eins konar "lingua franca" landsins og opinbert tungumál þess ásamt ensku og hiri motu.

Ef ég ætti að skrifa um menningu Papúa Nýju Gíneu myndi það sennilega enda í heilli bók. Nánast hvert þorp hefur sína eigin menningu. Landið er sannkölluð paradís mannfræðinga.

Matarmenning Papúa Nýju Gíneu er sjálfsagt jafn fjölbreytt. En helstu hráefnin sem eru notuð eru þó hrísgrjón, sagógrjón, sætar kartöflur, sjávarfang, kjúklingur, villibráð, svínakjöt og alls kyns grænt grænmeti.

Þótt mér finnist landið einstaklega merkilegt verð ég að segja að mér fannst uppskriftin þaðan það ekki.

Kjúklingur og grænmeti í kókosmjólk

2 msk olía

3-4 kjúklingabringur eða úrbeinuð læri

2 hvítlauksrif, smátt söxuð

1 dós kókosmjólk

1 tsk engiferduft

200 g grasker, í bitum

200 g frosið spínat

salt og pipar

1. Byrjið á að skera kjúklinginn í þægilega stóra bita og steikið á pönnu í nokkrar mínútur eða þar til þeir verða gullnir að lit.

2. Bætið  hvítlauknum út í og steikið áfram í 2-3 mínútur.

3. Setjið kókosmjólkina, engiferduftið, graskerið og spínatið út í og blandið öllu vel saman.

4. Eldið þar til kjúklingurinn er tilbúinn og saltið svo og piprið.

5. Rétturinn er venjulega borinn fram með hrísgrjónum, blómkáls/brokkolígrjón væru því vel við hæfi hér.

Þessi réttur fannst mér alveg hrikalega bragðlaus og ómerkilegur. Það er kannski ekki skrýtið þegar einu kryddin eru engiferduft, hvítlaukur og pipar (og meira að segja bætti ég við pipar). Ég get ekki mælt með þessum. 

Þá eru 58 af 198 löndum búin. Næsta stopp er Suður Kórea!

Afríka: 16 af 54 (29%)

Asía: 7 af 49 (14%)

Evrópa: 16 af 46 (34%)

Eyjaálfa: 8 af 14 (57%)

Norður Ameríka: 7 af 23 (30%)

Suður Ameríka: 4 af 12 (33%)

Samtals: 58 af 198 (29,3%)